Un dos piares de CeibaRimas é a formación en rap improvisado en galego, orientada sobre todo á mocidade, que realizamos a través dos nosos obradoiros. O noso obxectivo é crear espazos seguros nos que a xente sinta a liberdade de poder expresarse en galego a través do freestyle. Desde que o proxecto botou a andar son máis de 150 formacións as que impartimos por distintos espazos. Traballamos principalmente con institucións e colectivos que queren organizar actividades de improvisación en galego. Nestes obradoiros xs participantes coñecerán as ferramentas básicas para desenvolverse no mundo do freestyle da man de Nervo, o cantante principal do grupo Rebeliom do Inframundo.

Deste xeito, e xunto cos vídeos de adestramento online, ofrecemos ferramentas ás persoas participantes para mellorar o seu nivel de improvisación e así poder presentarse aos nosos eventos competitivos de rap en galego.

Estes obradoiros son adaptables a todas a idades, duracións e tipos de grupo, adecuando os contidos ás necesidades de cada formación.